Matul il-medda ta' aktar minn 145 sena ta' ħajja, il-kumitat tas-Soċjetà Filarmonika Leone dejjem ħa ħsieb li jakkwista l-aħjar surmastrijiet ta' dak iż-żmien għall-banda. Fil-fatt, tista' tiftaħar b'14 -il surmast li kollha ħallew impatt pożittiv u notevoli fuq il-banda. Hekk insibu pereżempju, l-ewwel surmastrijiet li kienu strumentali għat-twaqqif tal-banda. Anton Miruzzi ħallielna fost l-ewwel kompożizzjonijiet funebri u Vincenzo Carabott l-ewwel innu l-kbir ta' Santa Marija; l-ewwel wieħed li qatt kien hawn f'Għawdex. Warajh ġie Orlando Crescimanno bil-kapulavuri tal-innu l-kbir u l-innu La Croce (1913); żewġ ġawhriet fl-arkivji mużikali; arkivji li komplew jistagħnew bil-mużika ta' Giovanni Giumarra, l-ewwel surmast impjegat f'Għawdex, u Ġużè Stivala li t-tnejn li huma ġabu unuri kbar lill-banda bir-rebħ ta' kompetizzjonijiet mużikali esegwiti minnha. Tkompli l-lista u jitfaċċaw ismijiet notevoli bħal Willie Attard li ħallielna wirt mużikali tant għażiż għall-purċissjoni ta' Santa Marija, Joseph Sammut li beda l-opri fit-Teatru Aurora u s-surmast attwali Colin Attard li, apparti milli għandu rekord ta' opri li dderieġa fit-Teatru tal-Opra Aurora, kien strumentali biex aġġorna l-orjentament u l-identità tal-banda li tgħożż u teċċella kemm fil-klassiku kemm fil-kontemporanju.

Is-Surmast Direttur tal-banda jiġi maħtur mill-Kumitat Ċentrali iżda mhux membru fih. Ikun mistieden għal xi laqgħat tal-Kummissjoni Banda biex jagħti pariri u opinjonijiet tekniċi u loġistiċi dwar mużika li l-kummissjoni tkun trid tipproponi lill-kumitat biex tindaqq f'xi okkażjonijiet.
 

Fundatur tal-Banda 'Tal-Binu'   Ġorġ Tabone 1841-1916

Fundatur tal-Banda 'Ta' Dirjanu'   Dirjanu Lanzon 1820-1894

	1879-1884 Achille Lanzon 1848-1918
	1885-1887 Antonio Buhagiar 1861-1932
	1888-1889 Emanuele Vassallo 1853-1921
	1890-1893   Antonio Miruzzi 1867-1944
	1893-1910 Vincenzo Carabott 1844-1914
	1911-1923 Orlando Crescimanno 1861-1923
	1923-1933 Giovanni Giumarra 1861-1936
	1933-1937 Ġużè Stivala 1897-1950
	1937-1941 Luigi Di Mauro 1882-1942
	1942-1944 Pawlu Lanzon 1870-1959
	1944-1957 Willie Attard 1901-1970
	1957-1958 Joseph Abela Scolaro 1912-1979
	1958-1991 Joseph Sammut 1926-
	1991- Colin Attard 1962-

Ritratti: Mis-Sala tal-Kunċerti 29 t'April 1956; prop. Soċ. Fil. Leone A.D.1863